كەشە جۋالى اۋدانىنداعى «تاۋ سامالى» لاگەرىندە «مۇمكىندىكتەر مەكەنى» دەپ اتالاتىن وبلىستىق جاستار لاگەرى تۇندىگىن ءتۇردى. بۇل جولى تاۋ بوكتەرىندەگى جاسىل جەلەكپەن كومەرگەن اۋماقتا تىنىستاۋعا تۇڭعىش رەت مۇمكىندىگى شەكتەۋلى جاستار مۇمكىندىك الدى. وبلىستىڭ بارلىق اۋداندارىنان كەلگەن مۇمكىندىگى شەكتەۋلى جاستار مەن ولاردىڭ كۇتۋشىلەرىنەن، اتا-انالارىنان تۇراتىن دەمالۋشىلاردىڭ جالپى سانى 230-دان اسىپ جىعىلادى دەپ جازادى Qamshy.kz اقپارات اگەنتتىگى.
مۇمكىندىگى شەكتەۋلى جاندار ءۇش كۇن بويى قالانىڭ ۋ-شۋىنان قاشىقتاعى تاۋدىڭ ساف اۋاسىمەن دەمالىپ قانا قويماي ءتۇرلى سەمينار-ترەنينگتەردىڭ بەلسەندى قاتىسۋشى اتانباق.
جامبىل وبلىستىق جاستار رەسۋرستىق ورتالىعى مۇرىندىق بولىپ وتىرعان شارا جاستار جىلى قارساڭىندا مۇمكىندىگى شەكتەۋلى جانداردى قوعامنان شەت قالدىرماي كەرىسىنشە ولاردىڭ لايىقتى ءومىر سۇرۋىنە جاعداي جاساۋ ماقساتىن كوزدەيدى. وقىتۋ لاگەرىنىڭ اشىلۋ سالتاناتىندا سويلەگەن سوزىندە وبلىستىق جاستار رەسۋرستىق ورتالىعى ديرەكتورىنىڭ ورىنباسارى ايبەك تاۋتەن دە وسى جايتقا باسا نازار اۋداردى.
–بىزدە بۇعان دەيىن جاستاردى وقىتۋ لاگەرى ءارتۇرلى فورماتتا، ءتۇرلى تاقىرىپپەن وتكىزىلگەن. بيىلعى ەرەكشەلىك ءبىز مۇندا مۇمكىندىگى شەكتەۋلى جاستاردى جيناپ وتىرمىز. ءۇش كۇندىك وقىتۋ لاگەرى بارىسىندا ءبىز ولاردىڭ شىن مانىندە شەكتەۋسىز مۇمكىندىك يەسى ەكەندىگىنە كوزدەرىن جەتكىزەتىن بولامىز. سەمينار-ترەنينگتەر «نۇر بالا» قوعامدىق قورىنىڭ بىلىكتى ماماندارىمەن جانە وبلىستىڭ بەلسەندى جاستارىمەن جۇرگىزىلەدى. ەڭ باستىسى تاۋ بوكتەرىندەگى جانعا جايلى كليمات مۇمكىندىگى شەكتەۋلى جانداردىڭ دەنساۋلىعىنا وڭ اسەرىن تيگىزەرى انىق. جانە ولاردىڭ بارلىعىنىڭ دەنساۋلىق جاعدايى ءۇش كۇن بويى دارىگەرلەردىڭ تۇراقتى باقىلاۋىندا بولادى،–دەيدى ا.تاۋتەن.
وقىتۋ لاگەرىنىڭ اشىلۋ سالتاناتىندا دەمالۋشىلاردىڭ الاڭسىز تىنىستاۋىنا جاۋاپتى ۇيىمداستىرۋ كوميتەتىنىڭ مۇشەلەرى جانە توپ جەتەكشىلەرى تانىستىرىلدى. مۇنان ءارى شارا كونسەرتتىك باعدارلاماعا ۇلاستى.
ايتا كەتۋ كەرەك ءۇش كۇنگە سوزىلاتىن وقىتۋ لاگەرىنىڭ العاشقى كۇنىندە دەمالۋشىلار «نۇر بالا» قوعامدىق قورىنىڭ پسيحولوگ ماماندارى ايگەرىم داۋلەتبايەۆا، سالتانات ءسادۋاقاسوۆانىڭ سەمينار ترەنينگتەرىنە قاتىسىپ، توپتىق جۇمىستارعا اتسالىسادى. سونداي-اق مۇمكىندىگى شەكتەۋلى جاستارعا وبلىس ماقتانىشى، پاراليمپيادالىق ويىندارىنىڭ چەمپيونى زۋلفيا گابيدۋللينا سىندى ءتۇرلى سالادا جەمىستى ەڭبەك ەتىپ جۇرگەن مودەراتورلار ءدارىس وقيدى.
پىكىر قالدىرۋ